На вчерашната 65-та седница на Советот на општина Прилеп беше донесена одлука за дополнителни еден милион денари поддршка кон фудбалскиот клуб Победа.
Поранешниот шампион на Македонија е во тешка ситуација, а со помошта од општина Прилеп се очекува веднаш собирање на екипата и започнување со подготовки за новата сезона која започнува на 23 август.
„Поради лошата состојба во моментов во ФК Победа, пред почетокот на Седницата, беше доставено и барање од ФК Победа АД – Прилеп, за финансиска поддршка од Општината за понатамошно функционирање на клубот за непречено натпреварување и функционирање на младинските школи. Поради итноста, барањето беше разгледано од Комисијата за финансирање и Буџет и беше донесена одлука за дополнителни 1.000.000 денари поддршка кон ФК Победа“, Совет на општина Прилеп.
Победа покрај тоа што ќе треба веднаш да ги започне подготовките, ќе треба да бара и играчи, бидејќи речиси сите играчи од првиот тим се заминати во нови среди, а се очекува според информациите на Спортска Мрежа враќање на прилепски фудбалери кои ќе треба да помогнат Победа да застане на стабилни нозе од аспект на резултати и да се цели кон директен опстанок – бидејќи поради кратењето на лигата испаѓаат последните пет екипи (од 16-то до 12-то место), а пак екипите на деветтото, десеттото и единаесеттото место играат бараж за опстанок.
Победа новата сезона во Втората лига ја отвара против Новаци.
