Брера Струмица продолжува со реконструкцијата на тимот за новата сезона, а најново име во редовите на клубот е српскиот одбранбен фудбалер Лука Лукович.
Фудбалерот од Белград има 24 години и доаѓа од малтешкиот клуб Балзан, каде што настапуваше во пролетниот дел од минатата сезона. Лукович е висок над два метри и се истакнува со физичка доминација и присуство во дефанзивната линија.
Покрај искуството во Малта, тој има играно и две сезони во Естонија, каде ги бранеше боите на две различни екипи, а во својата татковина Србија има настапувано за клубови како Смедерево, Слога Краљево, Телеоптик, Синѓелиќ и други.
Со своето искуство и физички предиспозиции, Лукович се очекува да биде клучен играч и вистински столб на одбраната на Брера Струмица, која во новата сезона ќе се претстави со подмладен и амбициозен состав.
