Ракометниот клуб ГРК Охрид влегува во новата сезона со големи амбиции и јасна цел – борба за самиот врв. По интензивниот летен преоден рок, во кој беа ангажирани неколку интернационалци со докажан квалитет, клубот испраќа порака дека е подготвен за највисоки предизвици.
Новиот кормилар на охридскиот колектив, српскиот стратег Борис Ројевиќ, ја презеде функцијата пред стартот на подготовките и веднаш се зафати со предизвикот да ја постави основата на еден конкурентен и силно мотивиран тим. Клучните играчи од минатата сезона останаа да бидат дел од тимот, додека ростерот беше надграден со неколку домашни и странски имиња кои ќе донесат дополнителен квалитет и искуство.
Ројевиќ го поздравува односот и залагањето на ракометарите во првите денови од работата, но е свесен дека е неопходно време за играчите целосно да се усогласат и да ја изградат потребната тимска хемија.
,, Навистина сум презадоволен од почетокот, како работат момците, од залагањето, од односот на сите во клубот и имам само зборови на благодарност. Фокусот е на нас. Имаме нова екипа ќе ни треба малку повеќе време да се воиграме, но ќе гледаме што побрзо да влеземе во форма и што порано да даваме добри партии ”, вели Ројевиќ.
Со вакви подготовки и подновен состав, Охрид се наметнува како еден од скриените адути во претстојната сезона — тим што може сериозно да им ги помати сметките на фаворитите и да го предизвика статусот на доминантните клубови како Еурофарм Пелистер и Вардар.
,, Ќе ни треба време да видиме до каде сме, сигурно е дека наши амбиции се ГРК Охрид да почне да победува против најсилните екипи во Македонија ”, истакнува Ројевиќ.
