Македонскиот шампион Шкендија го претрпе првиот пораз ова лето во Европа, и тоа на домашен терен против силниот Карабах од Азербејџан, со минимални 0-1, во првиот натпревар од третото квалификациско коло од Лигата на шампионите.
На Националната Арена „Тодор Проески“, пред околу 18.000 гледачи, меѓу кои и верните Балисти, Шкендија не успеа да ја повтори ефективната игра од претходните рунди. Тетовци влегоа во мечот без промени во почетниот состав, но една невнимателна ситуација ја одбележа средбата – пенал по старт на Вебстер над Леандро Андраде.
По прегледот на ВАР-системот, главниот судија покажа на белата точка, а Турал Бајрамов беше прецизен реализатор за водство на Карабах уште во 18. минута.
По примениот погодок, Шкендија се разбуди. Имаше неколку добри шанси преку Бесарт Ибраими, Алхасан, па и нововлезените Зејнулаи и Ќака. Но, сите удари беа или непрецизни или одбранети од одличниот Матеуш Кохалски.
На спротивната страна, африканскиот голман на Шкендија, Бубакар Геје, беше херојот на вечерта. Тој спречи сигурни голови на Зубир и Акунѕаде, и не дозволи Карабах да замине со поубедлив резултат.
Во второто полувреме, тренерот Беќири се обиде со тактички измени да внесе живост во играта, но и покрај неколкуте добри обиди, резултатот остана непроменет.
Шкендија имаше дури и зицер шанси во финишот, но Ибраими, Тамба и Ќака не успеаја да ја затресат мрежата на Кохалски. Последниот обид во 88. минута повторно заврши право во рацете на голманот.
Сега пред македонскиот првак стои јасна задача – во реваншот во Баку ќе мора да слави со најмалку еден гол разлика за да остане во трката за пласман во плејофот од Лигата на шампионите. Таму го чека победникот од дуелот Лудогорец – Ференцварош.
