Денес во Гевгелија ќе се одигра дербито за трите бодови меѓу Кожуф и Детонит Плачковица, а во рамки на шестата рунда од Втората лига. Соочување на две екипи кои претендираат за висок пласман, две екипи кои играат одлично и имаат позитивни резултати.
Кожуф сега води борба на еден фронт, откако ги заврши настапите во Купот на Македонија максимално посветен атакува само на Втората лига. Сака од втор план да изненади за пласман во Прва лига и засега Филип Деспотовски одлично го води Кожуф, кој патем го има и најдобриот стрелец Дарко Гроздановски со седум погодоци по пет одиграни меча.
Детонит Плачковица се пласираше во следната фаза од Купот, а во првенството тргна одлично, нанижа одлични резултати и сега е на само три бодови од врвот од табелата каде што е Брегалница. Во Гевгелија повеќе од јасно е дека четата на штипскиот стратег Горан Здравков оди по три бодови.
И едните и другите имаат одличен тим, со одлични играчи, поединци кои во минатото биле дел од Првата лига, но играле и во странство, нивното искуство е големо во спојот со помлади играчи.
Натпреварот се игра на Градскиот стадион во Гевгелија, со почеток од 14 часот, а задолжена за правдата ќе биде искусната Ивана Пројковска.
