Градот Охрид повторно е центарот на македонскиот ракомет. Во четири години, охриѓани по вторпат ја добиваат честа да бидат домаќини на завршниот турнир од Купот на Македонија, а овојпат – на задоволство на локалната публика – меѓу најдобрите четири е и ГРК Охрид.
Градоначалникот на Охрид, Кирил Пецаков, на официјалното претставување на турнирот истакна дека организирањето на еден ваков настан е голема чест за градот и ракометниот клуб.
„За нас како град, ова е втор фајнал-фор во организација во последните четири години. За разлика од претходниот пат, сега и ГРК Охрид е дел од најдобрите четири екипи во Купот на Македонија. Се надевам дека и како организатори и како домаќини ќе бидеме на висина на задачата, и дека и во иднина ќе ја зграпчиме секоја можност повторно да бидеме домаќини на фајнл-фор“, рече Пецаков.
На финалниот турнир во Охрид ќе настапат екипите на ГРК Охрид, РК Еурофарм Пелистер, РК Вардар и РК Алкалоид, кои со години наназад го сочинуваат врвот на македонскиот машки ракомет.
„Ова е четворка која во последните неколку години ја сочинува елитата на македонското ракометно првенство. Јас лично посакувам фер и спортска игра, многу среќа – и, секако, нека победи подобриот“, додаде Пецаков.
Очекувањата се високи, а охридската публика повторно ќе има можност да ужива во врвен ракометен спектакл.
