Во недела ќе се одиграат натпреварите од полуфиналето на Општинската фудбалска А-лига на Битола, што претставува четврто ниво на натпреварување.
Екипата на Победа Ивањевци ќе се соочи со Могила во натпревар закажан за 17:00 часот, додека Лисолај ќе игра против Крошу Спорт во меч кој ќе започне два часа порано – во 15:00 часот.
Двата натпревари ќе се одиграат на одлично подготвениот терен во Црно Буки, каде ќе се води битка за пласман во големото финале и шанса за титула во ОФЛ Битола, која носи и промоција во Третата лига – Југозапад.
Победа Ивањевци имаше одлична сезона и го заврши првенството на првото место во А1 лигата на ОФЛ Битола со биланс од 13 победи, 5 ремија и 3 порази, освојувајќи вкупно 44 бодови. Второпласиран беше Крошу Спорт со ист број победи (13), но со 3 ремија и 5 порази – 42 бодови.
Во дербито на последното, 21. коло, Победа Ивањевци славеше над Крошу Спорт со 5:2. Димитар Даскаловски постигна два гола, а по еден додадоа Даниел Паревски, Саше Ночевски и Никола Трајчевски. За Крошу Спорт погоди Александар Крстевски, додека Ардиџан Јакуповски си постигна автогол.
Тренерот Драганчо Велевски, кој ја предводи Победа од Ивањевци, изрази задоволство од досегашните игри и нагласи дека фокусот е целосно насочен кон полуфиналето, со една цел – пласман во Третата лига – Југозапад.
И во А2-лигата борбата беше неизвесна до последното коло. Лисолај заврши на првото место со 18 победи, 2 ремија и само 1 пораз – вкупно 56 бодови. Могила заврши веднаш зад нив со 18 победи, 1 реми и 2 порази, и 55 бодови.
Во последното коло, двете екипи одиграа директен дуел за врвот, кој заврши без победник – 2:2. Антонио Спировски беше двоен стрелец за Могила, додека за Лисолај погоди Кристијан Симиќ. Во 90-тата минута, Дарко Мантевски си постигна автогол, што донесе поделба на бодовите.
Победниците од двете полуфинални средби ќе се сретнат во големото финале, а шампионот ќе обезбеди место во Трета лига – Југозапад за сезоната 2025/2026.
