Во недела, на 25 мај, ќе се одигра големото финале од плеј-офот во Општинската фудбалска лига на Куманово, каде ќе се сретнат екипите на Победа од Тромеѓа и Лопате.
Двете екипи обезбедија пласман во финалето по убедливи настапи во полуфиналните натпревари, кои се одиграа на теренот во Агино Село – локација каде ќе се игра и финалниот дуел. Технички организатор на натпреварот е ФК Македонија Агино Село.
Победа во полуфиналето славеше со 2:0 против Јуниор од Доброшане, додека Лопате беше убедлив со високи 8:1 против Четирце.
Фудбалскиот терен во Агино Село важи за еден од најдобрите терени во регионот, постојано е во одлична состојба и пример за одржување, а за тоа Спортска Мрежа веќе неколку пати има информирано.
Организаторот најавува вистински фудбалски празник – заедничко навивање со скара, пиво и добро друштво. Атмосферата ќе започне да се загрева од 15 часот, а почетокот на натпреварот е закажан за 16:30 часот.
