Футсал елитата на Македонија ќе брои десет екипи и во натпреварувачката сезона 2025/2026. Стана познато кои клубови ќе бидат дел од Првата футсал лига, а шампионот Форца ќе ја брани двојната круна освоена во изминатата сезона.
Покрај актуелниот првак и освојувач на Купот, Форца, во најсилната футсал конкуренција ќе настапуваат и тимовите: Клими, Проект, Осогово, Шкупи, Кеги Моби, Јувентус Серава и Бутел.
Новитети во прволигашкото друштво се Мал Ајакс од Штип и Балкан – двете екипи кои обезбедија промоција преку Втората футсал лига и ќе ги заменат испаднатите Железарец и Црна Река.
Останува да се одиграат уште последните две кола од Втората футсал лига со што официјално ќе се заокружи футсал сезоната во Македонија, а вниманието потоа ќе се префрли кон подготовките за новото првенство, кое се очекува да стартува наесен, како и квалификациите во Лигата на шампиони кои ќе ги игра Форца.
