По пауза од цели 18 години, фудбалскиот клуб Вардар повторно се искачи на врвот и го освои трофејот во Купот на Македонија. Во финалниот натпревар одигран против екипата на Струга Трим Лум, „црвено-црните“ славеа со 2-0 и конечно го прекинаа долгогодишното „проклетство“ во ова натпреварување.
Херој на финалето беше младиот Михаил Талевски, кој ги постигна двата гола за Вардар. Првиот погодок дојде во 26. минута, кога по едно нафрлување од левата страна, Талевски ја зафати топката со колено и ја смести во мрежата на Струга. Со тој резултат се замина на полувреме.
Само три минути по почетокот на второто полувреме, Талевски повторно беше во главна улога – по индивидуална акција и одличен удар ја удвои предноста на Вардар, резултат кој остана непроменет до самиот крај.
Иако Струга ТЛ имаше свои шанси, особено преку Кехинде, не успеа да ги реализира. Вардар пак, иако немаше многу прилики, беше поефикасен и поконцентриран во клучните моменти.
Со оваа победа, покрај трофејот, Вардар обезбеди и пласман во квалификациите за Конференциската лига на УЕФА, што е огромен успех ако се има предвид дека тимот до неодамна водеше битка за опстанок во првенството.
Оваа титула е доказ за успешната работа на стручниот штаб и фудбалерите, а навивачите на најтрофејниот македонски клуб конечно добија причина за голема радост и нови надежи за иднината.
