Заврши сезоната во Третата македонска фудбалска лига – Југ, екипата на Големо Коњари е шампион, тимот ја прослави титулата и сега ќе го чека противникот во баражот за влез во Втора лига.
Во доминантна сезона екипата на Големо Коњари стана шампион со 18 победи, три ремија и два порази, а притоа го имаше најдобриот напад со 75 гола и најдобрата одбрана со десет примени голови и собрани 57 бодови.
Тимот на Големо Коњари на последниот меч со 0:3 славеше над Дреново. Стрелци на погодоците беа Борче Сркески, Виктор Тошески и Христијан Кукески.
На мечот меѓу Влазними Јуниор и Слога од Лажани беа постигнати десет погодоци, за победа на гостинскиот тим од 4:6. Фејзулоски беше двоен стрелец за домаќинот, а по еден гол постигнаа Шабаноски и Ибраими. За гостинската екипа Османоски постигна два гола, а по еден Каришиќ, Угљанин, Ибраими и Мејдини.
Екипата на Превалец со триумф од 2:1 над Пити Гули од Крушево ја затвори сезоната пласирајќи се на второто место. Екипата на Превалец уште во првиот дел имаше 2:0 со погодоците на Давид Скуловски и Ристо Станковски, а за гостите гол постигна Оливер Велевски.
Поранешниот второлигаш Росоман со 2:3 славеше над Ултрас на теренот со вештачка трева во Прилеп. Тошески и Тасески беа стрелци за домашниот тим, за гостинот Миланов беше двоен стрелец, а еден гол постигна Јованов.
Бучин со 3:2 забележа домашна победа и победнички ја заврши сезоната откако славеше над Младост од Кривогаштани. Србиноски, Николовски и Мургоски беа стрелци за домашниот тим, а за гостинот погодија Пејоски и Чапкуноски.
