Кошаркарскиот клуб Ангели успеа да се избори за историски пласман во Првата лига,, откако во третиот и решавачки натпревар од полуфиналето во Втората лига ја совлада екипата на Соколи 1933 од Штип со 82:70 и така ја доби серијата со 2-1 во победи.
Во преполната сала и пред својата публика, Ангели по вторпат беа подобри од упорните штипјани, кои на полувремето имаа предност од осум поени (41:33). Сепак, следеше силен резултатски пресврт во третата четвртина, кога домаќините одиграа фантастично и со серија 30:13 поведоа со 63:54.
Во последниот период, Соколи 1933 се обиде да се врати во натпреварот, намалувајќи на 67:63 со серија од 9-4, но четири минути пред крајот Ангели повторно го презедоа контролната палка. Со нова серија од девет поени, го зголемија водството на 76:63 и практично го решија прашањето на победникот.
Гостите немаа сили за нов камбек, па натпреварот заврши со победа на домашната екипа, која сосема заслужено се избори за влез во елитната конкуренција.
Најефикасен кај победничката екипа беше Ибраими со 21 поен, додека Стојанов реализираше 17, а капитенот Стојаноски запиша 14 поени. Кај Соколи, Костадинов постигна 22 поени, Тодороски заврши со 20, а капитенот Караколев додаде 12.
Покрај Ангели, место во Првата лига обезбеди и тимот на Маџари, кој во другата полуфинална серија беше подобар од МЗТ Скопје Уни Банка. Овие две екипи ќе се сретнат во финалето на Втората лига и ќе се борат за шампионската титула, додека поразените од полуфиналињата – Соколи 1933 и МЗТ Скопје Уни Банка – ќе разигруваат за третото место.
