Третата македонска фудабалска лига – Југозапад продолжува со 11 екипа во понатамошно натпреварување, откако екипата на Светлост од битолското село Кукуречани нема да продолжи со натпреварување.
Причината поради која Светлост се откажа од понатамошно натпреварување е поради немање на финансиски средства.
Оваа значи дека Трета лига – Југозапад која започна со 12 екипи сезоната ќе ја комплетира со екипа помалку, односно ќе продолжат со натпреварување 11 екипи.
Светлост требаше утре на домашен терен да се соочи со лидерот Преспа, а сега екипата од Ресен во рамки на првото пролетно коло или 12-тата рунда ќе биде слободна.
Екипата на Светлост немаше полусезона каква што посакуваше, откако тимот во есенскиот дел имаше само една победа и десет порази и на своето конто собра само три бодови со што се наоѓа на дното од табелата, притоа екипата од Кукуречани постигна само 11 погодоци што е најлош напад во есенскиот дел на Трета лига – Југозапад, а прими 41 погодок што пак е втора најлоша одбрана после таа на Велешта која има примено 42 гола.
Како што веќе информираше Спортска Мрежа, седиштето на Трета лига – Југозапад е променето од ОФС Охрид во ОФС Битола, а од таа причина и стартот на пролетниот дел кој требаше да се случи минатиот викенд беше одложен за утре.
