Тиверија Брера му го нанесе првиот сезонски пораз на Љуботен, шампионот Скопје се доближи на само еден бод до врвот

Тиверија Брера му го нанесе првиот сезонски пораз на Љуботен, а шампионот Скопје со убедлива гостинска победа ја намали разликата до лидерот на само еден бод. Тринаесеттото коло во Првата женска фудбалска лига донесе пет победи и вкупно 20 голови.

Струмичанки го добија дербито со Љуботен со 3:1, откако сите четири погодоци паднаа во второто полувреме. Данче Карпузовска го отвори резултатот во 69. минута, Билјана Панеска зголеми во 71., а Теона Галабовска погоди за 3:0 во 85. минута. Улза Максути во 89. минута го постави конечниот резултат. Тиверија Брера со осмата сезонска победа стигна до 25 бода, седум помалку од лидерот.

Киксот на Љуботен го искористи шампионот Скопје, кој славеше со 0:7 кај Речица. Емилија Ивковиќ погоди во четвртата минута, Јована Каралиоска во 31., Глорија Тодорова во 34., а Рабија Дервиши во 41. минута ја заокружи предноста од 0:4 на полувремето. Во продолжението реализираа Мила Панева во 58., Дервиши со својот втор гол во 70. и Јана Милошевска во 79. минута.

Каменица Саса остана бодовно израмнета со Тиверија Брера, откако со голот на Стефанија Веселинова во 71. минута го совлада Вардар со 0:1. Пелистер со идентичен резултат славеше кај Истатов, благодарение на погодокот на Сара Петровска во 80. минута, и стигна до 23 бода.

Ас Јунајтед го победи Кочани со 5:2 и со 20 бода ја задржа шестата позиција. Двоен стрелец за стружанки беше Ихдина Речи, а по еден гол постигнаа Веса Села, Тамара Лазеска и Јована Павловска, а пак за гостинот погодија искусната Катерина Милеска и Лина Мицоска. На врвот, пак, Љуботен сега има минимална предност пред Скопје, што ја прави трката за титулата уште понеизвесна.

Резултати од 13. коло:

Табела по 13. коло: