Во пресрет на 13 Ноември, Денот на ослободувањето на Скопје, ракометарите на Вардар 1961 реализираа посета со посебно значење, оддавајќи почит на историјата на градот со кој клубот е поврзан повеќе од шест децении.
„Црвено-црните“ беа гости во Музејот на град Скопје, каде што преку поставените експонати и историските приказни имаа можност поблиску да се запознаат со минатото на престолнината.
Посетата беше потсетување и на долгогодишната врска меѓу Скопје и Вардар, чии спортски успеси, предизвици и незаборавни моменти се дел од градската историја.
Посебен момент од посетата беше подарувањето на дресот на Тимур Дибиров, една од најголемите клупски легенди. Во име на Вардар, капитенот Васил Гогов му го предаде на музејот дресот што рускиот ракометар го носеше на својот последен натпревар во вардаровиот дрес.
Подарокот, кој доаѓа од периодот на најголемите европски успеси на клубот и освојувањето на континенталниот врв, ќе остане како дел од спортското наследство на Скопје.
Од клубот упатија благодарност до навивачот Александар Узуновски – Узун, кој го донирал дресот, како и до Музејот на град Скопје за гостопримството и можноста за оваа симболична средба со историјата.
Вардар и Скопје делат многу повеќе од спортска приказна. Нивната поврзаност трае 65 години, а ваквите гестови се потсетник дека најголемите клупски моменти се истовремено и дел од колективното сеќавање на градот.
