Европската сезона на Еурофарм Пелистер влегува во решавачка фаза, а битолчани на 17 ноември ги очекува исклучително важен дуел во Лигата на Европа. Во салата „Боро Чурлевски“ пристигнува германскиот Гумерсбах, противник против кого македонскиот вицешампион ќе бара бодови што можат значително да ги зголемат шансите за пласман во елиминациската фаза.
Од клубот ја истакнуваат важноста на претстојниот предизвик и повикуваат на максимална поддршка од трибините. Пред Пелистер се три натпревари во кои ќе се решава европската судбина, а средбата со германскиот состав е првата од трите клучни можности за продолжување на натпреварувањето.
Интересот за дуелот веќе се чувствува, а влезниците се пуштени во продажба по цена од 200 и 250 денари, во зависност од избраното место во салата.
Натпреварот е закажан за 17 ноември со почеток во 20:45 часот. На табелата Гумерсбах е лидер со четири бода, Вибжеже Гдањск и Ла Риоха имаат по три, додека Еурофарм Пелистер досега освои еден бод.
За битолчани ова е можност да направат важен чекор кон европската пролет, а пораката од клубот е јасна – на терен борба за секоја топка, а од трибините поддршка за секој гол. Битола и Пелистер повторно заедно во обидот да ја продолжат европската приказна!
