Македонската младинска репрезентација ја искористува актуелната ЕХФ недела за продолжување на работата со генерацијата која во наредниот период ја очекува голем меѓународен предизвик. Во фокусот на стручниот штаб е Светското првенство во 2027 година, на кое Македонија ќе биде домаќин, па подготовките за настапот на домашен терен започнуваат навреме.
Селекторот Игор Илиевски на располагање има 16 ракометари, а составот во најголем дел го сочинуваат играчи кои ја претставуваа Македонија на Европското првенство во Романија минатото лето. Претстојниот период ќе биде важен за нивното воигрување и напредок пред настапот на светската сцена.
Во рамките на оваа репрезентативна акција, младинците ќе ги одмерат силите со македонската кадетска селекција во два контролни натпревари. Првиот е закажан за в среда од 15:00 часот, додека вториот ќе се одигра в петок со почеток на пладне.
Меѓусебните дуели ќе му овозможат на стручниот штаб да ги провери расположливите сили и да продолжи со оформувањето на тимот што ќе ја претставува Македонија на домашниот Мундијал.
