Македонскиот ракометен класик меѓу Вардар и Еурофарм Пелистер ќе се игра пред полни трибини. Сите билети за утрешната пресметка меѓу двата големи ривали се распродадени, па салата „Јане Сандански“ ќе биде исполнета до последното место.
Од таборот на „црвено-црните“ очекуваат вистински ракометен спектакл, со одлична атмосфера и поддршка од навивачите. Дополнителен момент на дербито ќе биде и заедничката кореографија подготвена за целата сала.
Поради нејзината реализација, Вардар упати апел до сите посетители да пристигнат најмалку 15 минути пред почетокот на натпреварот и да ги заземат своите места навреме. Воедно, од клубот потенцираат дека ништо од поставеното на седиштата не треба да се подига пред да добијат знак од лицата задолжени за координација.
Дуелот Вардар – Еурофарм Пелистер е закажан за 1 ноември со почеток во 17:45 часот, а со распродадената сала и најавената кореографија, сè е подготвено за уште едно ракометно дерби во кое црвено-црната боја ќе доминира на трибините.
