Со натпреварот меѓу Силекс и Шкендија Арачиново денеска започнува 11. коло во Првата македонска фудбалска лига. Двете екипи влегуваат во пресметката со јасна цел – освојување на трите бода и продолжување на борбата за позициите што водат кон европските натпреварувања.
Силекс ќе се обиде да ја продолжи позитивната серија по убедливата победа од 0:3 на гостувањето кај Башкими во Куманово. Со тој триумф, кратовци ставија крај на резултатската криза, а сега пред своите навивачи ќе имаат можност да потврдат дека се враќаат во посакуваниот ритам.
Тимот предводен од Александар Васоски го очекува дуел со дебитантот Шкендија Арачиново, која исто така има мотив да стигне до победата и да се врати на победничките патеки.
За Силекс оваа средба има дополнителна тежина и од табеларен аспект. Со евентуален триумф, кратовскиот состав ќе ја мине Шкендија Арачиново на табелата и ќе има можност да се искачи на петтата позиција, а зависно од резултатите на конкурентите од горниот дел, и да ја намали разликата во однос на местата што водат во Европа.
Од друга страна, Шкендија Арачиново со три бода во Кратово би продолжила да ги напаѓа позициите кон врвот и европската сцена. Арачиновци ќе мора да покажат реакција по променливите резултати во последниот период.
Формата на двата тима најавува неизвесен натпревар. На последните пет средби Шкендија Арачиново забележа две победи, два порази и едно реми, па гостувањето кај Силекс е можност за стабилизација и нов победнички импулс.
Со оваа пресметка се отвора 11. коло во ПМФЛ, кое ќе биде комплетирано во сабота и недела, кога на програмата ќе бидат уште четири натпревари.
