Ракометната федерација на Македонија планира организирање турнирски натпреварувања за најмладите категории, со цел поголема вклученост на децата во спортот и поттикнување на развојот на младинскиот ракомет во земјава.
Од РФМ упатија повик до сите заинтересирани ракометни клубови да пријават екипи за категоријата помлади пионери У13, наменета за деца родени во 2014 и 2015 година. Првиот турнир е планирано да се одржи на 31 октомври 2026 година во Скопје, по што активностите треба да продолжат и во други градови низ Македонија.
Клубовите треба да достават информации за бројот на екипи со кои планираат да учествуваат, како и список со имињата, презимињата и датумите на раѓање на децата. Потребно е посебно да се наведат машките и женските екипи, со бројот на учесници во секоја категорија.
Рокот за доставување на пријавите е среда, 21 октомври 2026 година. Пријавите треба да се испратат на електронската адреса handball@macedonianhandball.com.mk, со копија до mirkulovski@macedonianhandball.com.mk и ivan_iosifovski@outlook.com.
Покрај натпреварувањата за У13, РФМ ги повика клубовите да достават податоци и за децата родени во 2016 година и помлади, кои би биле заинтересирани за активности во категоријата мини ракомет. И во оваа категорија треба одделно да се прикаже бројот на машки и женски деца.
Врз основа на пристигнатите пријави, Федерацијата дополнително ќе ги утврди форматот, распоредот и начинот на организација на турнирите, за што клубовите ќе бидат навремено известени.
Со оваа иницијатива, РФМ има за цел да им овозможи на најмладите ракометари повеќе можности за натпреварување, стекнување искуство и дружење, а воедно да придонесе за поширока популаризација на ракометот меѓу децата низ Македонија.
