Актуелниот шампион Вардар рутински ја заврши задачата против Младост, славејќи со 44-34 во натпреварот кој, по договор меѓу двата клуба, наместо во Скопје се одигра во Богданци. На полувремето „црвено-црните“ имаа убедлива предност од 25-14.
За домаќините ова беше можност повторно да го пречекаат Вардар во својот град, потсетувајќи се на периодот од пред повеќе од една деценија кога скопскиот клуб редовно гостуваше во Богданци. На теренот, сепак, разликата во квалитет беше очигледна, па Младост не успеа да создаде вистинска неизвесност.
Вардар уште во првото полувреме направи двоцифрена разлика и практично ги реши сите дилеми околу победникот. Иако во продолжението Младост на моменти успеваше да го намали заостатокот под десет гола, гостите без поголеми проблеми го контролираа натпреварот и во финишот повторно ја потврдија високата предност.
И без дел од стандардните првотимци – Лазаревски, Педро, Бомаштар, Воркапиќ, Кеита и Стојановски – Вардар имаше доволно квалитет за убедлив триумф. Во второто полувреме своја шанса добија и младите Бобан Поповски, Марко Ѓорчевски и Николче Нечовски, кои добија значајна минутажа.
Ова беше меч каде младите ракометари добиваат шанса за драгоцено искуство со противник како Вардар.
Матео Фадуил беше прв стрелец на натпреварот со 13 гола, додека Љевар додаде осум за Вардар. Кај Младост, Тодор Узунчев постигна осум погодоци, а Владимир Бојаниќ седум. На крајот, Вардар ја задржа двоцифрената разлика и постигна 44 гола за нова победа.
Салата “Млаз” наликуваше како во добрите стари времиња кога Младост редовно играше и во Европа.
