КК Кожув Гевгелија продолжува со комплетирањето на ростерот за новата сезона, а најново засилување во составот е 26-годишниот Александар Колев.
Колев, кој е роден во Гевгелија, настапува на позициите 4/5, односно како крилен центар и центар, и ќе биде дополнителна опција за тимот во рекетот. Неговата физичка игра, борбеност и присуство под кошевите треба да му донесат дополнителна цврстина на Кожув во новата сезона.
Интересно е што Александар е брат на капитенот на КК Кожув, Илија Колев, па така кошаркарското семејство Колеви продолжува да биде дел од гевгелискиот клуб.
Со ангажманот на Александар Колев, КК Кожув Гевгелија добива уште една домашна опција во рекетот, а од 26-годишниот кошаркар се очекува со максимален ангажман да придонесе во остварувањето на целите на екипата во сезоната 2026/27.
За гевгеличани, неговото пристигнување има и посебна тежина, бидејќи уште еден домашен играч ќе го носи дресот на Кожув и ќе биде дел од новиот состав кој ќе се обиде да ја претстави Гевгелија во најдобро светло.
