Македонскиот футсал шампион Проект денеска немаше натпревар во претквалификациската група А од Лигата на шампионите, но денот беше искористен за подготовка на последниот и исклучително важен дуел во Грац.
Во таборот на македонскиот шампион беше одржана видео анализа, на која стручниот штаб со играчите ги разгледуваше досегашните натпревари, грешките, добрите моменти и деталите кои треба да се применат во последниот меч.
Атмосферата во екипата е одлична и позитивна, а фокусот е целосно насочен кон утрешниот натпревар против шампионот на Израел – Макаби Нетанја.
За најголем дел од фудбалерите на Проект, настапот во Грац е воедно и деби во Лигата на шампионите. Самото учество на европската сцена претставува огромно искуство за македонските футсалисти, кои имаат можност да се соочат со шампиони од различни европски земји и да го почувствуваат нивото на најелитното клупско натпреварување.
И веќе има играчи кои се запишаа во историјата на клубот.
Марио Благојевски и Горан Стојанов се запишаа како стрелци на Проект во ова издание од Лигата на шампионите, за нив овие се први мечеви во елитното европско натпреварување додека Иван Крстевски – Змија, кој веќе има искуство во Лигата на шампиони погоди во фантастичниот пресврт против словенечкиот шампион Врхника.
Токму тој натпревар покажа дека Проект може да игра рамноправно со европски шампиони. Македонскиот тим губеше со 1:2, но со головите на Стојанов и Крстевски направи пресврт до 3:2, пред Врхника во самиот финиш да израмни на 3:3.
- Следува последниот предизвик
🇮🇱 Макаби Нетанја – Проект 🇲🇰
📅 29 август
🕠 17:30 часот
🏟️ Bluebox Arena, Грац
Пред Проект е уште еден голем европски тест, а македонскиот шампион во позитивна атмосфера го очекува последниот натпревар од групата.
