Македонската таеквондистка Милијана Релиќ освои бронзен медал на Светското првенство за жени, кое се одржува во Кина. Релиќ оствари одличен настап во сениорската категорија до 62 килограми, забележувајќи три значајни победи над квалитетни противнички.
Македонката во првото коло беше слободна, а во нокаут-фазата стартуваше со победа од 2:0 против домашната претставничка Санг Џијао од Кина.
Во осминафиналето, Релиќ одигра уште еден тежок меч и со 2:1 ја совлада Уктамјонова Мохидил од Узбекистан, со што обезбеди пласман во четвртфиналето.
Таму следуваше нов голем предизвик, но Релиќ повторно покажа карактер и со 2:1 славеше против Ванг Веи Чиа од Тајпеј. Со оваа победа македонската таеквондистка обезбеди место на подиумот и бронзен медал на светскиот шампионат.
Во полуфиналето Релиќ се сретна со Софија Мотлок од Русија. По голема борба, русинката славеше со 2:1, па Релиќ го заврши настапот со бронзен медал од Светското првенство во Кина.
Ова е голем успех за македонскиот таеквондо спорт и уште еден доказ за квалитетот на Милијана Релиќ на најголемата светска сцена.
