Шкендија продолжува да гази во новата сезона на Првата македонска фудбалска лига. Тетовскиот тим ја запиша и петтата победа во низа, откако на гостувањето во Кратово го совлада Силекс со 0-2 и остана со максимален учинок по пет одиграни кола.
По почетните 45 минути без погодоци, гостите во продолжението успеаја да ја материјализираат подобрата игра и да го скршат отпорот на кратовчани.
Силекс добро се бранеше во првиот дел и се обидуваше преку брзи контранапади да го загрози голот на Шкендија. Џеков во неколку наврати беше на висината на задачата, додека гостите имаа и погодок кој беше поништен поради офсајд по интервенцијата на ВАР-собата.
Клучниот момент дојде во 53. минута. Бесарт Ибраими изведе прекин и испрати одлична топка во опасната зона, каде што најдобро реагираше Мелиќи, кој со удар со глава го совлада Џеков за 0-1.
По примениот гол, Силекс се обиде да возврати и во еден период сериозно го притисна противникот. Анѓелески и Шеро имаа свои можности, но голманот Рамани и дефанзивната линија на Шкендија успешно ги одбиваа налетите на домаќинот.
Како што се наближуваше крајот, Силекс мораше да ризикува и да тргне по израмнување, а токму тоа му остави простор на лидерот за контранапад.
Во 88. минута, Зејнулаи одлично го проигра Фахд Ндзенгуе, кој се најде во идеална позиција и рутински ја погоди мрежата за 0-2, ставајќи точка на натпреварот.
Со новиот триумф, Шкендија има максимални 15 бодови од првите пет кола и продолжува да го држи врвот на табелата со перфектен учинок.
За Силекс ова е ново разочарување, и покрај добриот отпор во најголемиот дел од натпреварот. Кратовчани остануваат на седум бодови по пет одиграни натпревари.
Пет мечеви – пет победи. Шкендија испраќа јасна порака дека и оваа сезона ќе биде сериозен кандидат за врвот.
