Ракометарите на Охрид повторно ќе се борат за трофејот на меморијалниот турнир „Крсте Андоновски“, откако во драматичен натпревар одиграа 30-30 против Загреб. Бодот беше доволен за „гладијаторите“ да го освојат првото место во групата А и да обезбедат пласман во големото финале, каде што ќе го бранат трофејот освоен минатото лето.
Херој на мечот беше десното крило Дарко Ѓукиќ, кој го постигна последниот гол на натпреварот и му донесе на Охрид резултат што беше доволен за финале. Охриѓани имаа гол-разлика +14, додека Загреб беше на +13, па само еден погодок во завршницата го одлучи патникот во финалето.
Капитенот на Охрид, Гоце Ојлески, за Спортска Мрежа, по натпреварот го истакна квалитетот на противникот, но и важноста од ваквите натпревари во подготвителниот период, посочувајќи дека тимот треба да извлече поуки од грешките.
„Сметам дека не е потребно да се трошат зборови за Загреб, сите знаеме кој е Загреб во ракометот и мислам дека тука нема што да разговарaме. Се договоривме пред почетокот на натпреварот да играме, да уживаме во овој натпревар и да не се оптоваруваме со резултатот. Имаше неколку падови во играта и многу, да кажам, грешки коишто не треба да се дозволуваат, меѓутоа ова е турнир каде што треба и да учиме од тие грешки. Можеби малку и сме и изморени, стигна и заморот… Секако дека и Загреб беше заморен, не е дека тие не се, меѓутоа на крајот излеговме со еден позитивен резултат и секако дека сме среќни што не сме поразени од таков голем тим како што е Загреб.“
Охрид со ремито го обезбеди првото место во групата, а во финалето повторно ќе се сретне со Вардар, исто како на Струшкиот турнир. Ојлески очекува уште една тешка пресметка против добро познат противник, но и јасна цел – одбрана на трофејот.
„Со Вардар веќе неколку години играме вака, доста се знаеме, се познаваме. Очекувам да дадеме максимум, секако дека посакуваме да го освоиме турнирот. Тоа е тоа, утре одиме во финале, финале се игра за да се победи, секако дека ќе дадеме сè од себе за да победиме.“- изјави Ојлески за Спортска Мрежа.
По пет гола во домашниот состав постигнаа Иванковиќ и Мате, додека голманот Славиќ запиша 11 одбрани. Кај Загреб, Бељавски беше најефикасен со девет погодоци.
Во битката за седмото место од 10:30 часот ќе играат Олимпијакос и Египет У20, за петтото место од 12:30 часот ќе се сретнат Нексе Нашице и Војводина. За третото место од 18:00 часот ќе играат Загреб и Тримо Требње, додека големото финале меѓу Охрид и Вардар ќе стартува од 20:15 часот.
