Македонскиот фудбалер Диме Димов ќе го напушти Локомотив Софија, бугарскиот прволигаш, и ќе ја продолжи кариерата во нов клуб. Димов, кој се истакна како еден од најдобрите играчи на тимот, одигра сезона и пол во Бугарија. Иако имаше договор до јуни 2025 година, 30-годишниот фудбалер одлучи да ја менува средината.
Во текот на својата кариера, Димов настапуваше за неколку македонски клубови, вклучувајќи ги Металург, Кожуф, Гостивар, Хоризонт Турново и Академија Пандев (денес Брера Струмица), каде беше и капитен на тимот.
Во Локомотив Софија, Димов одигра 56 натпревари и беше еден од клучните играчи. Неколку пати се најде во идеалниот тим на колото во Бугарија, а исто така неколку пати беше и играч на натпреварот. Во оваа сезона, има одиграно 19 натпревари во првенството поминувајќи 1.710 минути на теренот и еден во Купот на Бугарија со одиграни 90 минути.
Димов веќе привлекува интерес од неколку странски клубови, а се очекува наскоро да се дознае каде ќе ја продолжи својата фудбалска кариера. Во својата кариера, тој го има освоено Купот на Македонија со Брера Струмица (поранешна Академија Пандев) во сезоната 2018/2019.
