Второлигашот Пелистер продолжува активно да го комплетира играчкиот кадар за новата сезона, а најново засилување во битолскиот клуб е 19-годишниот напаѓач Давид Ивановски, кој пристигнува од редовите на Кожуф.
Станува збор за млад офанзивен фудбалер кој треба да внесе дополнителна конкуренција во нападот на „зелено-белите“. Ивановски своето фудбалско образование го стекнуваше во младинските школи на швајцарските Винтертур и Сент Гален, пред кариерата да ја продолжи на македонските терени.
Со неговото ангажирање, Пелистер продолжува со големата реконструкција на тимот по испаѓањето од Првата македонска фудбалска лига. Во Битола не ја кријат желбата експресно да се вратат во елитното друштво, па клубот веќе формира состав кој ќе биде меѓу главните фаворити за освојување на врвот во Втората лига.
Новата сезона за Пелистер започнува на 15 август, кога битолчани ќе имаат можност пред својата публика да го направат првиот чекор кон остварување на целта. Во воведното коло на домашен терен ќе го пречекаат дебитантот Камјани, натпревар кој ќе биде прва можност новите засилувања, меѓу кои и Давид Ивановски, да се претстават пред навивачите.
