ЖФК Каменица Саса успешно го отвори циклусот контролни натпревари во пресрет на новата сезона. „Рударките“ славеа со 0:2 против екипата на Речица, а херој на натпреварот беше капитенката Ана Димитровска, која ги постигна двата погодоци за победата.
Овој пријателски натпревар беше уште една можност стручниот штаб предводен од Зоран Златковски да ја провери моменталната форма на тимот, а Каменица Саса во периодот што следи ќе одигра уште неколку контролни средби со цел екипата максимално подготвена да ја дочека новата сезона.
Амбициите на клубот и оваа сезона се највисоки – напад на шампионската титула. Најголемиот дел од ростерот е задржан, што треба да обезбеди континуитет и стабилност во играта.
Како што претходно објави Спортска Мрежа, единствено бразилската интернационалка Тчеури Гоја го напушти клубот, додека раководството веќе донесе две странски засилувања.
Во редовите на Каменица Саса се врати бугарската репрезентативка Антонина Шопска, а клубот ја ангажираше и интернационалката од Црна Гора, Анџела Саововиќ, со што дополнително ги засили редовите во пресрет на новите предизвици.
Победата над Речица е добар показател дека тимот се движи во посакуваната насока, а во Македонска Каменица веруваат дека со квалитетниот ростер и добрата подготовка ќе бидат сериозен кандидат за освојување на шампионската титула во новата сезона.
