Во спортската сала на клубот за бразилско џиу-џицу Team Carvalho Macedonia од Радовиш под водство на Методија Зајков денес се одржа стручен семинар, на кој членовите на клубот имаа можност да стекнат нови знаења и да ги усовршат своите техники под водство на искусниот тренер Наде Ристов.
Гостин на семинарот беше прилепчанката Наде Ристов, носител на црн појас – 2 дан во џудо, која преку практични демонстрации и тренинг им го пренесе своето богато искуство на младите членови на радовишкиот клуб. Семинарот траеше околу два часа, а покрај теоретскиот дел, вклучуваше и практични вежби и борби, во кои учесниците имаа можност веднаш да ги применат новите техники.
Ристов е долгогодишен тренер во џудо, а токму поради големата поврзаност меѓу џудото и бразилското BJJ, на семинарот беше ставен акцент на техничките елементи, движењата, тактиката и искуствата кои можат успешно да се применат и во двата спорта.
Нејзината спортска приказна е добро позната во Радовиш. Заедно со својот сопруг Слаѓан Ристов, со години успешно го водеа џудо клубот Сенсеи, кој важеше за еден од најактивните клубови во градот и имаше голем број членови. Пред околу седум години семејството Ристов се пресели во Швајцарија, каде продолжи успешно да работи во областа на боречките спортови.
Денес, Наде Ристов е тренер во Judo Club Grenchen во Швајцарија, а престојот во Радовиш го искористи повторно да го сподели своето знаење со младите спортисти. Дел од членовите на Team Carvalho Macedonia веќе ја познаваа од претходните соработки, но овој пат, како поискусни и позрели натпреварувачи, имаа можност да совладаат нови техники и дополнително да ги надградат своите вештини.
Семинарот помина во одлична атмосфера, со многу работа, размена на искуства и позитивна енергија, а од клубот истакнуваат дека ваквите активности ќе продолжат и во иднина, со цел постојано унапредување на знаењето и развојот на нивните членови.
Воедно, од Team Carvalho Macedonia упатуваат покана до сите заинтересирани да станат дел од клубот. Секој кој сака да стане член на клубот или да добие повеќе информации може да контактира и на телефонскиот број 070 519 055Членството е целосно бесплатно, а клубот располага со сопствена спортска сала која обезбедува одлични услови за тренинг, подготовка и развој на сите љубители на бразилското џиу-џицу.
