Македонските атлетичари до 20 години имаа успешен настап на Балканското првенство во Романија, каде што освоија сребрен медал, поставија нов младински национален рекорд и забележаа повеќе лични и национални достигнувања.
Најголемиот успех го оствари женската штафета на 4х100 метри, која го освои сребрениот медал со нов младински национален рекорд од 48.95 секунди. Во составот на штафетата настапија Ева Митевска, Тамара Атанасовска, Лина Исени и Марта Димковска, кои го подобрија националниот рекорд што беше поставен уште во 1999 година.
Одличен настап имаше и Брајан Авиа, кој во скок во далечина постави нов младински национален рекорд со резултат од 7.15 метри, подобрувајќи го својот личен рекорд за четири сантиметри. Со овој скок го освои шестото место. Авиа беше успешен и во дисциплината скок во височина, каде со прескокнати 2.04 метри го освои петтото место.
Во скок во височина настапи и Иван Поповски, кој постави нов личен рекорд од 1.91 метар, што му донесе деветта позиција во конечниот пласман.
Во спринтот на 100 метри, Ева Митевска истрча нов личен рекорд од 12.40 секунди и го освои 11. место, додека Тамара Атанасовска со време од 12.63 секунди, исто така личен рекорд, се пласираше на 13. место.
Марта Димковска настапи и на трката на 400 метри, каде го освои 10. место.
Настапот на македонските атлетичари на Балканското првенство донесе значајни резултати, нов национален рекорд, бројни лични рекорди и уште една потврда за потенцијалот на младата генерација македонски атлетичари.
