Македонскиот ракомет останува без уште еден долгогодишен член на Суперлигата. Ракометниот клуб Пролет 62 официјално потврди дека во сезоната 2026/27 нема да настапува во елитното натпреварување, туку ќе се пресели во Првата лига.
Причината за ваквата одлука е завршувањето на соработката со долгогодишниот генерален спонзор „Тинекс“, поради што клубот не е во можност финансиски да го издржи настапот во Суперлигата. Од раководството истакнуваат дека одлуката е донесена со цел да се зачува стабилноста и иднината на клубот, кој зад себе има 64-годишна традиција.
Во изминатите години Пролет беше препознатлив како клуб што создава домашни ракометари и континуирано работи со младите категории.
И покрај заминувањето од елитата, главната определба останува развојот на младите играчи и пронаоѓањето нов генерален спонзор, кој во иднина би овозможил враќање во Суперлигата.
Според актуелните информации, испразнетото место во Суперлигата најверојатно ќе го пополни Струга, која по поразот од Младост во баражот се пресели во Првата лига.
Во продолжение го пренесуваме соопштението на РК Пролет 62 во целост:
„Ракометниот клуб Пролет 62 ја известува јавноста дека, поради завршувањето на договорот со нашиот долгогодишен и ценет генерален спонзор, донесовме тешка, но одговорна одлука да се повлечеме од натпреварувањето во Супер лигата за претстојната сезона.
Оваа одлука не е донесена лесно. Напротив, таа е резултат на внимателна анализа и единствено со цел да се зачува стабилноста и иднината на клубот. Веруваме дека во овој момент најодговорен чекор е да не преземаме финансиски обврски кои не би можеле целосно и навремено да ги исполниме.
РК Пролет 62 останува посветен на својата мисија – развојот на младите ракометари и продолжување на традицијата која клубот ја гради веќе 64 години. Клубот ќе продолжи да се натпреварува во Првата лига, а во наредниот период наш главен приоритет ќе биде пронаоѓање нов генерален спонзор кој ќе овозможи повторно враќање во Супер лигата и продолжување на успесите што заедно ги создававме.
Воедно, упатуваме искрена и огромна благодарност до нашиот досегашен генерален спонзор за долгогодишната доверба, поддршка и несебична посветеност, благодарение на која РК Пролет 62 со години успешно се натпреваруваше и остана дел од највисокото ниво на македонскиот ракомет. Неговиот придонес во одржувањето и развојот на клубот ќе остане трајно запишан во историјата на РК Пролет 62.
Исто така, им благодариме на сите наши навивачи, пријатели, играчи, тренери, родители, соработници и на сите кои во изминатите 64 години беа и остануваат дел од семејството на РК Пролет 62.
