Женската јуниорска репрезентација на Македонија го претрпе и вториот пораз на контролните натпревари против Бугарија, откако во денешниот дуел во Ботевград домаќинот славеше со 77:56.
Македонската селекција настапи значително ослабена поради отсуството на неколку важни кошаркарки – Ива Колева, Глорија Груевска, Ана-Марија Димитровски, како и Вања Милосаљевиќ, која не беше во составот за овој натпревар. Бугарија тоа го искористи и уште од самиот почеток наметна силно темпо, создавајќи убедлива предност.
По првата четвртина домашната репрезентација имаше водство од 27:11, а на полувремето разликата изнесуваше 42:21.
Во второто полувреме избраничките на селекторот Виктор Петровски одиграа далеку поорганизирано и порамноправно. Натпреварот беше изедначен во продолжението, а Македонија во последната четвртина успеа да ја намали негативата и да остави подобар впечаток пред крајот на средбата.
Најефикасна во македонскиот состав беше Карајованова, која забележа „дабл-дабл“ со 13 поени и 11 скока. Трајковска додаде 11 поени, додека Пислевска натпреварот го заврши со девет поени.
Двата контролни натпревари во Ботевград беа дел од подготовките на македонската репрезентација за Европското првенство од Дивизијата „Б“, кое од 31 јули до 9 август ќе се одржи во Тулчеа, Романија.
