Узбекистанскиот прволигаш Согдиана ја продолжи соработката со македонскиот репрезентативец Љупче Дориев, кој стави потпис на нов договор со важност до 2030 година.
Дориев зад себе има одлична сезона во дресот на Согдиана и во моментов е најдобар стрелец во шампионатот на Узбекистан. Со своите настапи тој се наметна како еден од клучните фудбалери на екипата и важи за најдобар играч на клубот.
Раководството на Согдиана одлучи да ја награди неговата одлична форма со нов четиригодишен договор, со што македонскиот репрезентативец ќе остане дел од клубот и во наредните сезони.
Продолжувањето на соработката претставува потврда за довербата која клубот ја има во Дориев, кој со головите и асистенциите е еден од најзаслужните за успесите на тимот во домашното првенство.
