Младиот фудбалер на Македонија ЃП, Антиан Емини, ја одбележа сезоната 2025/2026 во Кадетската супер лига, откако со неверојатни 29 погодоци заврши како најдобар стрелец во шампионатот.
Станува збор за еден од најголемите фудбалски таленти во Македонија, фудбалер кој од натпревар во натпревар го привлекува вниманието со својата ефикасност, брзина, чувство за гол и фудбалска интелигенција. Емини уште еднаш покажа дека пред себе има блескава иднина и дека македонскиот фудбал добива нов голгетер од голем калибар.
Младиот напаѓач потекнува од ФК Ускана од Кичево, клуб кој со години важи за вистински фудбалски расадник и место од каде излегуваат бројни талентирани фудбалери. Ускана уште еднаш потврди дека одлично работи со младите категории, а Антиан Емини е само уште еден доказ за квалитетната работа на кичевскиот клуб.
Освен во кадетска конкуренција, Емини сезонава добиваше шанса и во младинскиот состав на Македонија ЃП, каде исто така прикажуваше одлични партии. Во вкупно 30 натпревари во двете конкуренции постигна импресивни 35 голови, а зад своето име запиша и 24 асистенции, бројки кои ретко се гледаат кај фудбалер на негова возраст.
Дополнителна потврда за неговиот огромен потенцијал е и фактот што дебитираше за сениорскиот тим на Македонија ЃП во Првата македонска фудбалска лига со неполни 17 години. Во клубот очигледно имаат голема доверба во неговиот талент, а Емини со своите настапи покажува дека е подготвен за големи предизвици.
Со вакви бројки, настапи и развој, Антиан Емини без дилема е едно од најголемите откритија на младинскиот македонски фудбал, а ФК Ускана повторно докажува дека знае како да создава врвни фудбалски таленти за иднината на македонскиот фудбал.
