Утре ќе се одиграат натпреварите од 11. коло во Општинската фудбалска лига во Струмица, а вниманието на фудбалската јавност ќе биде насочено кон Балдовци, каде во големото дерби ќе се соочат есенскиот шампион Спартмани и актуелниот лидер Интер Кукла.
Тимот на Спартмани по слабите резултати во пролетниот дел ја загуби лидерската позиција и моментално се наоѓа на четвртото место со 17 бодови, додека Интер Кукла е осамен на врвот со 23 бодови, односно шест повеќе од својот утрешен ривал.
Без разлика на исходот, екипата од Куклиш ќе остане лидер и по ова коло, бидејќи има четири бодови повеќе од второпласираниот Огражден, но јасно е дека Интер Кукла ќе атакува на осмата сезонска победа и продолжување на одличната форма. Од друга страна, Спартмани ќе се обиде конечно да стигне до првиот пролетен триумф и повторно да се врати во трката за самиот врв.
Интересно ќе биде и во Радово, каде во дербито на дното ќе се сретнат Напредок и Единство. Двете екипи имаат по три бодови и се заковани на дното од табелата, па утрешниот меч е директна битка за бегство од последната позиција. Победникот ќе направи чекор напред кон претпоследното место, додека поразениот дополнително ќе ја продлабочи кризата.
Во Добрејци, Илинден ќе го пречека Огражден од Ново Село. Гостите се во победнички ритам и сериозно го напаѓаат првото место на табелата. Доколку Огражден ја оправда фаворитската улога и стигне до шестиот сезонски триумф, ќе има 22 бодови и ќе се доближи на само еден бод до Интер Кукла, во случај лидерот да киксне во Балдовци.
Сепак, Илинден има свои амбиции и со евентуална победа би можел да направи голем скок на табелата. Во таков случај тимот би стигнал до 19 бодови и би се вмешал во битката за третото место, особено ако Спартмани и Слога Злеово не успеат да освојат бодови.
Токму Слога Злеово ја продолжува својата битка за врвот со гостување кај Дрвош. Натпреварот има огромно значење за екипата од радовишко Злеово, која ова коло го гледа како последен „воз“ за вклучување во трката за лидерската позиција.
Во клубот владее максимална мобилизација, а за навивачите е обезбеден бесплатен превоз, па се очекува Слога да има силна поддршка во Дрвош и атмосфера како на домашен терен. Слога ќе атакува на шестиот сезонски триумф, додека домашниот состав ќе се обиде да стигне до петтата победа оваа сезона.
