Ракометниот клуб Прилеп го промовираше своето ново засилување за следната сезона, откако во своите редови го донесе пикерот Петар Маркоски.
Станува збор за 28-годишен ракометар од Струга, кој во Прилеп пристигнува од екипата на РК Еурофарм Пелистер 2, носејќи со себе значајно искуство, физичка цврстина и борбеност на линијата од шест метри.
Маркоски стави потпис на договор со важност од две години, со што клубот јасно покажува дека сериозно смета на неговите квалитети во наредниот период. Од Прилеп очекуваат тој да донесе стабилност во одбраната, сигурна реализација во нападот, но и дополнителна енергија која ќе биде од големо значење за тимската игра.
Со овој трансфер, РК Прилеп продолжува со екипирање на ростерот, со јасна цел – што поконкурентен тим и успешни резултати во претстојните предизвици.
