„Колото кое решава голема судбина“ во Втората лига ги донесе двете дерби пресметки во Струмица и Автокоманда.
Во рамки на денешното 27. коло во Струмица на „Благој Истатов“ во директна пресметка силите ги одмерија Беласица и лидерот Брегалница, каде штипјани беа подобри со минимални 0:1.
По неколку одлични интервенции на домашниот голман Ѓорги Трајков во првиот дел мрежите беа чисти во Струмица, во второто полувреме Брегалница создаваше притисок по голот на противникот, а во 80. минута главниот судија Доне Ристовски покажа на белата точка, Капсаров биеше од белата точка, но голманот Трајков го одбрани тој удар, но одбиената топка успеа некако Дино Михолов да ја втурне во мрежата за 0:1.
Сега Брегалница ќе решава следно коло против Шкендија Арачиново во Штип.
Во Автокоманда на стадионот „Железарница“ се играше уште едно дерби меѓу Скопје и Охрид, во трката за трите бодови подобар беше домаќинот со голот на Мердиан Рамадани во 10. минута за конечни 1:0.
Шкендија Арачиново оваа коло имаше лесна задача и на домашен терен го доби отпишаниот Вардар Неготино со резултат од убедливи 8:2. Двојни стрелци беа Владимир Жоглев и Христијан Димов, а по еден гол постигнаа Ален Јашароски , Дестан Адили, Зани Назифи и Сухејб Рушити.
За гостинската екипа Раде Рајчиновски и Константино Алекс Горгиовски беа стрелци.
На Градскиот стадион во Радовиш се одигра дербито меѓу Детонит Плачковица и Каменица Саса, каде немаше победник и немаше погодоци (0:0), за делба на бодовите.
Во Кочани тимот на Осогово против Кожуф забележа пораз од минимални 0:1, гостинот од Гевгелија триумфираше со голот на Филип Тодороски во 15. минута.
Тетекс во Прилеп славеше триумф над Победа со резултат од 0:3 преку Лука Гавроски, Едис Бајрами и Азис Јамини.
Новаци ја оправда фаворитската улога откако во Виница ја доби Слога со резултат од 0:2, а стрелци беа Стефан Јовановски и Стефан Секирски.
Колото ќе биде затворено утре со мечот меѓу Големо Коњари и Преспа, натпревар кој стартува од 16 часот.
