Кошаркарите на Пелистер испратија силна порака пред почетокот на плеј-офот, откако на гостински терен го совладаа актуелниот шампион МЗТ Скопје Аеродром со 74:85 во рамки на ТОП 6 фазата од Супер лигата.
Битолчани одиграа зрело и тактички дисциплинирано, а клучот на победата го поставија во втората четвртина. По почетната негатива (18:21), „зелено-белите“ направија одлична серија од 28:16 и на полувреме заминаа со солидна предност од 46:37.
Иако домаќинот се обиде да се врати во игра во третиот период, Пелистер повторно го крена нивото во последната четвртина. Токму тогаш гостите ја демонстрираа својата доминација, создавајќи и убедлива разлика која во еден момент достигна и 21 поен (83:62), што беше недостижно за „штрковите“.
Особено впечатлива беше реализацијата за три поени – 11 погодени шута од 20 обиди (55%), каде предводници беа Стојановски и Митревски, со значаен придонес и од Дејвис и Џенкинс.
Дејвис го предводеше Пелистер со 18 поени, дополнети со седум скока и пет асистенции. Митревски реализираше 17 поени, Стојановски додаде 16, додека Џенкинс запиша 13 поени, шест скока и четири асистенции.
Кај МЗТ Скопје Аеродром, Смит Мексвејн беше најефикасен со 19 поени, Танасковиќ постигна 15, а Гил оствари дабл-дабл учинок со 12 поени и 10 скока.
Со овој триумф, Пелистер го задржа третото место на табелата, додека МЗТ Скопје остана второпласиран. Тоа значи дека двата тима ќе се соочат во полуфиналната серија од плеј-офот, каде се очекува уште пожестока пресметка меѓу старите ривали.
