Викендов успешно беше реализиран кошаркарски хепенинг за најмладите кошаркари и кошаркарки кој се одржа во салата „26 Април“ во Гевгелија. Овој настан донесе посебна атмосфера и дружење за момчињата и девојчињата од М12 генерациите, кои настапија во двете конкуренции.
Кошаркарскиот караван оваа недела пристигна во СРЦ „26 Април“, каде на специјално прилагодени терени за најмладите категории продефилираа голем број идни кошаркари и кошаркарки од повеќе екипи од целата држава.
Покрај можноста за дружење, младите имаа шанса и да ги покажат своите кошаркарски вештини, натпреварувајќи се со врсници од различни градови. Настанот беше реализиран во организација на Кошаркарската федерација на Македонија.
Од федерацијата упатија благодарност до градот Гевгелија за гостопримството, а кошаркарскиот караван продолжува кон следната дестинација – Тетово.
