Новиот селектор на женската сениорска репрезентација во одбојка, Милош Гавриловиќ, го објави поширокиот список на одбојкарки кои ќе се појават на првата прозивка закажана за 13 мај во хотелот „Континентал“ во Скопје, со што официјално стартуваат подготовките за настапот во Европската лига 2026.
На списокот се наоѓаат вкупно 26 одбојкарки, меѓу кои дури девет дебитантки во А-селекцијата – сестрите Сара и Даниела Горбок, Кариа Трифуновска, Јована Каленикова, Матеа Сотировска, Стефанија Кипријановска, Андреа Митиќ, како и Софија Тенчева и Сара Димитриоска.
Од поискусните репрезентативки, поради приватни или работни обврски, ќе отсуствуваат Тамара Стојанова, Антонија Баталаковска и Ана Павлоска. Сепак, од стручниот штаб потенцираат дека на нив ќе се смета за следните собири.
Подготовките репрезентацијата ќе ги реализира во СЦ „Форца“ во Скопје, а како дел од подготовките ќе одигра и два пријателски натпревари против селекцијата на Косово на 29 и 30 мај.
Македонија настапот во Европската лига 2026 ќе го започне во Порто. На 6 јуни ќе се соочи со Унгарија, а ден подоцна и со домаќинот Португалија. Потоа следува турнирот во Аликанте, каде на 12 јуни ќе игра против Шпанија, додека на 13 јуни ќе се сретне со Азербејџан.
Настапот во ова издание од Европската лига, македонската репрезентација ќе го заврши на домашен терен во СЦ „Борис Трајковски“ во Скопје, каде на 19 јуни ќе игра против Хрватска, а на 21 јуни против Словенија.
