По убедливиот триумф над Луксембург на отворањето на квалификациите за ЕП 2028, македонските ракометари денеска ги очекува нов предизвик. Избраниците на Кирил Лазаров гостуваат кај Грција во Халкида, во обид да ја продолжат успешната серија и да освојат нови бодови во трката за место на континенталниот шампионат.
Историјата на меѓусебните квалификациски пресметки е на страната на Македонија. Двете репрезентации досега одиграле осум натпревари во квалификациите за Европските и Светските првенства, а нашиот национален тим славел на шест од нив, додека двапати загубил.
Интересен е податокот дека на четирите досегашни гостувања на грчка територија, Македонија има по две победи и порази. Успесите ги остварила во Атина, додека неуспешни биле гостувањата во Кукуш и Кожани. Исто така, разликите во тие средби биле минимални – победите биле извојувани со два гола, а поразите биле со еден и два гола разлика, во 2002 и 2018 година.
Денешната средба носи нова можност за македонските ракометари да го потврдат позитивниот биланс и да направат важен чекор во квалификациската група.
Натпреварот Грција – Македонија започнува во 16:00 часот во салата „Тасос Камбурис“ во Халкида. Влезот е слободен, а се очекува исполнета сала до последното место.
