Ракометарите на Вардар 1961 го заокружија настапот во Купот на Македонија со нов трофеј, откако во финалето го совладаа Охрид со 24-23. По завршувањето на возбудливиот дуел, вниманието беше насочено и кон индивидуалните признанија, кои ги одбележаа најдобрите поединци на турнирот.
Во центарот на вниманието беше словенечкиот бек Јака Малус, кој со одличните партии заслужено ги понесе двете најпрестижни награди – за најкорисен играч (МВП) и за најдобар стрелец. Малус на патот до трофејот постигна вкупно 17 голови на дуелите против Алкалоид и Охрид, со што беше клучен фактор во успехот на „црвено-црните“.
На спротивната страна, признанието за најдобар голман заврши кај Кристијан Пилиповиќ од Охрид, кој со серија одбрани, особено во финалниот натпревар, беше еден од најзаслужните што неговиот тим до последен момент беше во игра за трофејот.
Иако пехарот замина во витрините на Вардар, индивидуалните награди потврдија дека финалето донесе врвни изданија и на двете страни.
