Некогашниот шампион на Македонија, екипата на Железарец славеше во дербито на колото против директниот конкурент СЕЕ Университи со 3:1 и го трасираше патот кон шампионската титула во Втората футсал лига, а со тоа и експресно враќање во елитата.
Резултатот на мечот од 19. коло го отвори Петре Далиоски во 17. минута за водство од 1:0 на полувреме. Во вториот дел Мартин Калчев во 32. минута беше прецизен за двојна предност на домаќинот, а по две минути Едис Муртезани погоди за 2:1 и ја врати неизвесноста за трите бодови во самиот финиш.
Сепак, сите дилеми ги реши Реџеп Бислим во завршните мигови за конечни 3:1.
Железарец е на врвот со 46 бодови, а скопскиот тим има седум бодови повеќе од СЕЕ Университи кој е втор, а пак Каршиака е на третата позиција со 37 бодови. Но, треба да се истакна дека Железарец има меч повеќе во однос на конкурентите.
Само првите две позиции водат кон директен влез во Прва лига.
Натпреварот во Кочани меѓу Фудбал Старс и ССК не се одигра, откако гостинскиот тим не допатува по чекање од 30 минути, откако пријавиле дефект на превозното средство.
Ниту мечот во Кратово не се одигра, таму требаше да играат тимот на Кратово и Конзули, но гостинот од Битола не пристигна по чекање од 30 минути.
Вечерва се игра мечот меѓу Карадаку и Овче Поле.
