Фудбалскиот стадион „Езеро“ во Крушево претставува вистински пример како со посветеност, грижа и љубов кон спортот може да се создадат одлични услови за работа, и покрај скромните финансиски можности.
На овој стадион своите натпревари ги игра третолигашот Питу Гули, клуб со богата историја кој во минатото беше дел и од Втората лига. Денес, иако настапува во понизок ранг односно во Трета лига – Југ, условите на кои функционира клубот се на завидно ниво.
Теренот на „Езеро“ е во одлична состојба, во полн сјај и според квалитетот може слободно да конкурира, па дури и да ги надмине условите на некои стадиони каде се игра второлигашки и прволигашки фудбал.
Зад ваквата слика стои сериозна работа – континуирана грижа, внимание и голема посветеност од луѓето кои го одржуваат и живеат за клубот и спортот во Крушево.
Ова е доказ дека љубовта кон фудбалот може да направи разлика. Во Крушево постои искрена желба за напредок, а токму ваквите проекти покажуваат дека со правилен пристап може да се создадат услови достојни за развој на млади фудбалери, но и за одигрување квалитетни натпревари.
Дополнително, Крушево како туристички центар има огромен потенцијал да стане база за спортски подготовки. Чистиот воздух, природата и ваквата инфраструктура се одлична комбинација за екипи кои бараат идеални услови за тренинг.
Спортска Мрежа и понатаму ќе ги истакнува ваквите позитивни примери – терени и стадиони каде со многу љубов, труд и посветеност се создаваат услови за спортски развој. „Езеро“ во Крушево е токму таков пример – како треба да се однесуваме кон спортската инфраструктура.
