Охрид и Вардар ќе се соочат во големото финале на Купот на Македонија, кое утре ќе се одигра во Струмица. По одличните изданија во полуфиналето, охриѓани со многу самодоверба влегуваат во битката за трофејот, каде ги очекува најтрофејниот македонски клуб.
Пивотменот на Охрид, Џанфранко Прибетиќ, го најави утрешното финале. Тој најави тежок и неизвесен натпревар, потенцирајќи дека тимот верува во своите шанси и е подготвен да се надигрува со фаворитот.
„Нè очекува тежок натпревар во финалето на Купот против екипата на Вардар. Верувам дека ќе биде еден возбудлив натпревар во кој двете екипи ќе дадат се од себе и нека победи подобриот. За екипата на Вардар не треба многу да се зборува, сите знаеме за каква екипа се работи, а ние се надеваме дека ќе им ги измешаме математиките.“- изјави Прибетиќ.
Финалето е закажано за недела од 20:00 часот во салата „Парк“ во Струмица, каде Охрид ќе се обиде да го направи најголемиот успех во клупската историја и да го освои првиот Куп-трофеј.
