Ракометарките на Ѓорче Петров со убедлива и сигурна игра обезбедија ново финале во Купот на Македонија, откако во полуфиналето во Струмица славеа против Пелистер со високи 37-15.
Уште од самиот почеток беше јасно кој ќе ја диктира играта. „Лавиците“ отворија фуриозно и со серија од 7-0 практично го решија прашањето околу победникот. До крајот на првиот дел разликата дополнително порасна, па на пауза се замина со убедливи 19-5.
Во продолжението, и покрај ротациите во составот, фаворитот ја задржа контролата и рутински го приведе натпреварот до крај. Младиот тим на Пелистер се бореше колку што можеше, но немаше капацитет да парира на поискусниот противник.
Најефикасна во победничкиот состав беше Стефанија Ѓоргиевска со девет погодоци, додека кај Пелистер по три пати во листата на стрелци се запишаа Елмазовска, Бундоска и Тодоровска.
Со оваа победа, Ѓорче Петров ќе има можност да го брани трофејот, а противникот во финалето ќе го добие од дуелот меѓу Чаир и Спартак, кој се игра вечерва во салата „Парк“.
