Фудбалерите на Охрид испишаа историја во Купот на Македонија, откако обезбедија пласман во полуфиналето совладувајќи го актуелниот бранител Вардар по изведување на пенали, со што закажаа двомеч против прволигашот Силекс.
Сепак, пред охриѓани се појави неочекуван проблем. Тимот нема да може да го одигра домашниот натпревар на стадионот „Билјанини Извори“ поради условите поврзани со ВАР-технологијата, па ќе мора да бара алтернативен терен, ексклузивно дознава Спортска Мрежа.
Според информациите на редакцијата на Спортска Мрежа, најреална опција е Охрид да го одигра домашниот полуфинален натпревар на стадионот во Струга, за што веќе клубот ја извести ФФМ за пријавување на тој стадион за одигрување на натпреварот со Силекс.
Според информациите на Спортска Мрежа, управата на Охрид вложи сериозни напори да се овозможат услови за да се одигра мечот на „Билјанини Извори“, но сепак нема зелено светло од ФФМ.
Првиот натпревар од полуфиналето меѓу Охрид и Силекс е закажан за 22 април.
