Синоќа, во салата на Арената во Белград, КК Партизан организираше свечена промоција на монографијата „Првите 80 години на КК Партизан“, дело на авторите Владимир Сибиновиќ и Миленко Јањиќ.
Настанот беше одлична можност на едно место да се соберат повеќе од 300 гости – поранешни и сегашни членови на еден од најголемите кошаркарски клубови во регионот и Европа.
Монографијата, која содржи над 500 фотографии на повеќе од 400 страници, привлече големо внимание, а меѓу присутните беа и македонски кошаркари кои оставиле значаен белег во дресот на „црно-белите“. Меѓу нив се најдоа Владо Илиевски, актуелен спортски директор на националните селекции, како и Игор Михајловски, дел од легендарната генерација што го освои Купот на шампионите.
Свеченоста се совпадна и со значаен јубилеј – 34 години од историското освојување на европската титула во 1992 година во Истанбул. По тој повод, беше организирано и заедничко дружење на дел од творците на најголемиот успех во историјата на клубот.
Владо Илиевски и Игор Михајловски остануваат важен дел од богатата историја на белградскиот Партизан.
