Охрид е првиот финалист во Купот на Македонија, откако во полуфиналето убедливо го совлада Еурофарм Пелистер со 26-19. Во одлична форма, охриѓани целосно го надиграа актуелниот шампион и заслужено обезбедија место во борбата за трофејот.
Еден од најзаслужните за победата беше Дарко Ѓукиќ, кој постигна 5 гола и по натпреварот даде изјава за Спортска Мрежа, нагласувајќи дека тимот целосно го контролирал мечот и максимално ја искористил подобрата подготовка.
„ Го контролиравме овој натпревар од почеток до крај..пред недела дена победивме во Битола и тоа ни даде самодоверба дека можеме да го победиме и овој меч- и така и направивме. Убаво се подготвивме за Купот, мислам дека имавме повеќе време да се одмориме и подготвиме за разлика од Пелистер, тие играа тежок меч со Алкалоид во вторникот, така што некако времето беше на наша страна. Се подготвивме добро и го одигравме можеби нашиот најдобар натпревар- пред сè во одбрана, па потоа и во напад..примивме само 19 гола, така што мислам дека сите сме презадоволни и ќе дадеме сè од себе за да победиме и во недела, во финалето против победникот од второто полуфинале.“
Во продолжение, Ѓукиќ истакна дека овој пласман има историско значење за клубот и градот, но и дека тимот е подготвен да оди до крај и да се бори за првиот Куп-трофеј.
„ Сите сме пресреќни, направивме еден историски успех за град како што е Охрид, мислам дека градот го заслужува тоа и секако дека ќе го дадеме својот максимум и за да го освоиме Купот во недела. Се истрошивме доста на овој натпревар, но со оглед на тоа дека во некои моменти од мечот имавме и 10 разлика, па тоа ни дозволи и малку повеќе ротација, сметам дека можеби и не сме толку уморни, па дури имаме и три часа повеќе одмор од вториот полуфиналист, така што искрено, мислам дека ќе се обидеме да го донесеме првиот Куп – трофеј во нашите витрини.”- изјави Ѓукиќ за Спортска Мрежа.
Со оваа победа, Охрид ја потврди одличната форма и ја продолжи победничката серија против Пелистер. Во финалето, кое се игра в недела од 20:00 часот, охриѓани ќе се борат за трофејот против победникот од второто полуфинале- Алкалоид или Вардар, со јасна цел – историски прв Куп-трофеј.
